Cefnogaeth i deuluoedd
Rydym yn deall pa mor anodd yw hi i gael sgyrsiau am ofal diwedd oes. Ond yn sensitif ac yn barchus, bydd ein timau gofal a chefnogaeth i deuluoedd yn gweithio gyda chi i gynllunio’r gofal diwedd oes gorau bosibl i’ch plentyn a’ch teulu.
Ein nod yw dod i adnabod pob plentyn a’i deulu fel ein bod yn gallu nodi a diwallu eu holl hanghenion cymaint â phosibl.
Rhywun i siarad â nhw
Rydym yn cynnig clust i wrando, therapïau ac amrywiaeth o gefnogaeth emosiynol arall i blant â chyflyrau sy’n byrhau bywyd, eu rheini a’u brodyr a’u chwiorydd.
Cefnogaeth ymarferol ac eiriolaeth
Rydym yn rhoi cefnogaeth ymarferol arbenigol ac eiriolaeth i wneud bywyd yn haws i chi, gwella ansawdd bywyd eich teulu a sicrhau nad ydych yn teimlo eich bod ar eich pen eich hun.
Cymorth Profedigaeth
Gall ein ymarferwyr cymorth i deuluoedd arbenigol roi cefnogaeth bwrpasol i aelodau eich teulu i’w helpu i alaru ac ymdopi â’u colled. Gallant hefyd eich atgyfeirio chi ac aelodau eich teulu at gymorth cwnsela arbenigol, os bydd ei angen ar unrhyw adeg.
Cefnogi pobl ifanc
Mae gennym fannau arbennig yn ein hosbis i gynnal gweithgareddau a digwyddiadau pwrpasol, ynghyd â grŵp cymorth yn benodol ar gyfer brodyr a chwiorydd yn eu harddegau. Mae nyrs bontio ar gael hefyd i gefnogi pobl ifanc 14 i 25 oed.
Ffyrdd eraill yr ydym yn cefnogi teuluoedd
Arhosiadau seibiant mewn argyfwng
Efallai y bydd adegau pan fydd anghenion gofal eich plentyn yn fwy cymhleth a beichus neu efallai bod sefyllfa deuluol yn golygu bod angen rhywfaint o gymorth ychwanegol arnoch. Os yw hyn yn wir, fe wnawn ein gorau i gynnig seibiant byr i chi.
Therapi a chymorth chwarae synhwyraidd
Mae ein hamrywiaeth o therapïau yn cynnwys therapi cerddoriaeth, therapi chwarae, ffisiotherapi, therapi galwedigaethol a therapïau cyflenwol fel tylino ac aromatherapi.
Rheoli symptomau
Mae ein gweithwyr gofal proffesiynol arbenigol wedi cael llawer iawn o hyfforddiant i reoli poen a symptomau eraill y gallai plant â chyflyrau sy’n byrhau bywyd eu profi.