Rydym yn darparu’r achubiaeth hon mewn cartrefi teuluoedd, cymunedau ledled Cymru ac yn ein hosbis arbenigol yn Sili, ym Mro Morgannwg.
Mae gan ein hosbis bopeth sydd ei angen i wneud arhosiad plentyn yn llawn hwyl ac yn ddiogel. Mae hyn yn cynnwys ystafelloedd chwarae lliwgar, ardaloedd cerddoriaeth, ystafelloedd synhwyraidd a phwll hydrotherapi mawr.
Mae gennym ni hyd at ddeg o ystafelloedd gwely preifat i blant, sy’n cynnig llawer o le ar gyfer eitemau a chyfarpar arbennig o gartref. Mae gennym hefyd lety teuluol rhagorol mewn ardal ar wahân sy’n agos at ystafelloedd gwely ein plant.
Ar gyfer pobl ifanc sydd eisiau mwy o annibyniaeth a mannau i rai mwy aeddfed, mae gennym ein Den. Mae’n cynnwys cegin hygyrch, parth gemau ac ystafell sinema.
Mae ein tir yn cynnig llawer o leoedd gwahanol i blant a theuluoedd eu mwynhau, gan gynnwys ardaloedd chwarae arbenigol, gardd synhwyraidd, llwybrau cerdded a llwybr cadair olwyn pwrpasol.
Mae gofalu am blentyn sydd â chyflwr sy’n byrhau bywyd yn aml yn gallu bod yn hynod o heriol – yn gorfforol ac yn emosiynol. Trwy ddarparu digwyddiadau hosbis a chymunedol i deuluoedd sy’n cynnwys cyfleoedd i gael mynediad at amrywiaeth o gymorth therapiwtig a lles, rydym yn rhoi cyfle i rieni a gofalwyr ymlacio ac adfer. Weithiau byddwn o bosibl yn gallu darparu arhosiad byr dros nos i gefnogi rhieni a gofalwyr.
Mae ein nyrsys clinigol arbenigol medrus yn gweithio gyda’n timau meddygol a gweithwyr gofal iechyd proffesiynol yn y gymuned i sicrhau bod symptomau’n cael eu rheoli’n effeithiol yn ein hosbis, gartref ac mewn ysbyty.
Trwy dechnegau arbenigol, cyfleusterau a thechnoleg amlsynnwyr, gall ein harbenigwyr therapi helpu’ch plentyn i gyfathrebu, cael hwyl ac ymgysylltu mwy â’i amgylchedd. Mae’r amhosibl yn bosibl.
Os yw eich plentyn yn agosáu at ddiwedd oes, gallwn helpu i sicrhau bod eich teulu cyfan yn cael y gofal a’r gefnogaeth arbenigol sydd ei angen arnynt drwy gydol y cyfnod anodd hwn.
Os hoffech siarad â rhywun ynghylch sut yr ydych chi’n teimlo, gan gynnwys unrhyw ofnau a phryderon y gallech fod yn eu profi, gallwn helpu.
Mae gennym ymarferwyr cymorth i deuluoedd sydd wedi’u hyfforddi hyd at safon uchel sydd â llawer o brofiad o wrando ar rieni plant sydd â salwch sy’n byrhau bywyd.
Ffoniwch 02920 532200 neu anfonwch neges e-bost i familysupport@tyhafan.org i drefnu sgwrs ag ymarferydd cymorth i deuluoedd heddiw.