Ein bwriad yw gweithio gyda gweithwyr iechyd a chymdeithasol proffesiynol i sicrhau bod plant â chyflyrau sy’n byrhau bywyd a’u teuluoedd yn cael y gofal a’r cymorth lliniarol arbenigol gorau sydd ar gael.
Rydym yn cynnig ein gofal a chymorth hanfodol mewn cartrefi teuluol, ysbytai, cymunedau ledled Cymru a’n hosbis sydd wedi’i hadeiladu’n bwrpasol yn Sili, ym Mro Morgannwg.
Mae gofal lliniarol plant yn canolbwyntio ar anghenion corfforol, emosiynol, cymdeithasol ac ysbrydol plentyn a’i deulu, a’i nod yw gwella ansawdd ei fywyd ym mhob ffordd bosibl.
Rydym yn darparu gofal lliniarol o’r adeg y caiff plentyn ddiagnosis hyd at ddiwedd oes y plentyn. Mae hyn yn cynnwys mynediad at ofal seibiant mewn argyfwng, rheoli symptomau a gofal diwedd oes, ynghyd ag amrywiaeth o therapïau a gweithgareddau sydd wedi’u cynllunio i annog datblygiad wrth dynnu sylw oddi wrth symptomau anghyfforddus ar yr un pryd. Os bydd person ifanc yn goroesi i fod yn oedolyn, rydym yn helpu i sicrhau bod y cyfnod pontio i wasanaethau oedolion yn un didrafferth.
Mae gofal lliniarol i blant hefyd yn cynnwys darparu cymorth a chyngor i deuluoedd i sicrhau y gallant reoli poen a symptomau eraill eu plentyn yn effeithiol.
Rydym hefyd yn cynnig cymorth emosiynol hanfodol i rieni, brodyr a chwiorydd ac aelodau eraill o’r teulu pryd bynnag y bydd ei angen arnynt, a chymorth mewn profedigaeth yn dilyn marwolaeth plentyn.
Rydym yn derbyn atgyfeiriadau ar bob cam o salwch plentyn neu berson ifanc. Mae’n bosibl hefyd y byddwn yn derbyn plant a phobl ifanc ag anghenion iechyd cymhleth a achosir gan gyflwr heb ddiagnosis.
Os ydych mewn cysylltiad â phlentyn fel hyn ac yn credu y bydd ein cymorth o fudd i blentyn a’i deulu, cysylltwch â’n nyrsys clinigol arbenigol drwy e-bostio clinicalnursespecialists@tyhafan.org neu ffoniwch 02920 532200. Maent ar gael rhwng 9am a 5pm, o ddydd Llun i ddydd Gwener.
Gallant ddweud mwy wrthych am ein meini prawf atgyfeirio, y cymorth am ddim a gynigiwn yn ein hosbis ac yn y gymuned, a sut y gallwn weithio gyda chi i ddarparu’r gofal gorau posibl.
Dysgwch fwy am wneud atgyfeiriad
Efallai y bydd rhai teuluoedd yn anfodlon cael cymorth gan Tŷ Hafan, oherwydd y byddant o bosibl yn credu yn awtomatig mai rhywle lle mae plant a phobl ifanc yn mynd i farw yw hosbis plant.
Gallwn eich cynghori ar rai ffyrdd effeithiol o drafod Tŷ Hafan â theulu, er mwyn sicrhau eu bod yn teimlo’n gadarnhaol am yr ystod eang o gymorth y gallwn ei gynnig iddynt.
Gallwn hefyd roi arweiniad i chi ar sut i siarad â theuluoedd am oblygiadau cyflwr eu plentyn mewn ffordd sensitif ond realistig.
Cysylltwch â’n tîm gofal drwy ffonio 029 2053 2200 i ddysgu mwy.
Drwy gydol yr amser y byddwch yn gofalu am blentyn â chyflwr sy’n byrhau bywyd a’i deulu, ein nod yw gweithio’n agos gyda chi a gweithwyr proffesiynol eraill i sicrhau ein bod yn darparu’r gwasanaeth amlddisgyblaethol mwyaf effeithiol posibl.
Gallwn ymateb i anghenion newidiol teulu, gan ddarparu cymorth bron yn unrhyw le, gan gynnwys yn ein hosbis, mewn cartrefi teuluol ac mewn ysbytai.
Byddwn hefyd yn sicrhau y caiff cysylltiadau eu cynnal rhwng yr holl weithwyr proffesiynol sy’n rhan o ofal pob plentyn. Bydd hyn yn cynnwys darparu gwybodaeth am y cymorth a ddarparwn a newidiadau i sefyllfa teulu.
At hynny, rydym ni yma i ateb unrhyw gwestiynau sydd gennych chi neu eich cydweithwyr, yn ogystal â chwestiynau’r plant, y rhieni ac aelodau eraill o’r teulu rydych chi’n ymgysylltu â nhw.
Rydym yn deall y gall darparu gofal i blant a phobl ifanc â chyflyrau sy’n byrhau bywyd beri llawer o heriau i weithwyr iechyd a gofal cymdeithasol proffesiynol.
Dyma pam rydym yn fodlon datblygu a chyflwyno hyfforddiant wedi’i deilwra i roi’r sgiliau a’r wybodaeth i weithwyr proffesiynol sy’n eu helpu i ddarparu’r cymorth mwyaf effeithiol.
Rydym yn cynnig hyfforddiant ac yn siarad ag unigolion, grwpiau a sefydliadau am y rhan fwyaf o bethau sy’n gysylltiedig â chefnogi plentyn â chyflwr sy’n byrhau bywyd.
Er enghraifft, gallem eich helpu i gefnogi myfyrwyr ac athrawon yn eich ysgol os yw un o’ch disgyblion wedi marw, neu gallem helpu canolfan chwarae meddal i ddatblygu gweithgareddau i blant ag anghenion cymhleth.
Rydym yn croesawu ceisiadau gan fyfyrwyr a gweithwyr iechyd a gofal cymdeithasol proffesiynol cymwys a hoffai ddeall mwy am ofal lliniarol a bywyd mewn hosbis plant.
Ymhlith y gweithwyr proffesiynol rydym wedi cynnig lleoliadau iddynt yn y gorffennol y mae nyrsys, meddygon, gweithwyr cymdeithasol, ffisiotherapyddion, arbenigwyr chwarae a therapyddion cerdd.
Our focus is to work with health and social professionals to make sure children with life-shortening conditions and their families receive the best specialist palliative care and support available. So we have created a list of frequently asked questions to help answer your queries.
And if you can’t find the information you need, please get in touch with our Family Support team at familysupport@tyhafan.org or on 029 2053 2200.