Gall y gefnogaeth arbenigol hon gael effaith hynod gadarnhaol ar iechyd meddwl a lles, yn ogystal â’r ffordd y mae teulu’n gweithredu.
Os hoffech chi neu aelod o’ch teulu fanteisio ar unrhyw un o’r gwasanaethau cefnogaeth emosiynol yr ydym ni’n ei darparu, peidiwch ag oedi, cysylltwch â’n tîm cymorth i deuluoedd ar 02920 532200 neu ar familysupport@tyhafan.org
Rydym ni yma i chi 24 awr y dydd, 365 diwrnod o’r flwyddyn, i helpu gydag unrhyw fater neu bryder yr ydych chi’n ei wynebu.
Rydym ni’n deall y gall plentyn neu berson ifanc sydd â salwch sy’n byrhau bywyd gael trafferth ag emosiynau anodd a theimlo’n unig. Yn Tŷ Hafan, rydym ni’n darparu amrywiaeth o gefnogaeth i helpu plant a phobl ifanc i weithio drwy eu teimladau.
Tîm cymorth i deuluoedd
Gall ein tîm ymroddedig weithio gyda phlentyn neu berson ifanc i ddeall eu hanghenion emosiynol a’u helpu i gael y gefnogaeth gywir.
Therapi chwarae
Rydym ni’n cynnig sesiynau unigol cyfrinachol gyda’n therapydd chwarae i helpu plentyn i fynegi sut mae’n teimlo.
Cefnogaeth gan gyfoedion
Rydym ni’n trefnu digwyddiadau a gweithgareddau i helpu’r plant yr ydym ni’n gofalu amdanynt gefnogi ei gilydd.
Grŵp Facebook
Mae cyfle i bobl ifanc dros 13 oed gysylltu ar-lein a helpu’i gilydd.
Efallai y bydd rhiant neu ofalwr plentyn sydd â salwch sy’n byrhau bywyd yn ei chael hi’n anodd rhannu sut maen nhw’n teimlo. Ond gallai siarad â rhywun y tu allan i’ch teulu neu gyda pherson sy’n mynd drwy amgylchiadau anodd fod yn help mawr.
Tîm cefnogi teuluoedd
Gall ein tîm ymroddedig weithio gyda rhiant neu ofalwr i ddeall eu hanghenion emosiynol a’u helpu nhw i gael y gefnogaeth gywir.
Grŵp cefnogi rhieni a gofalwyr
Rydym ni’n cynnal amrywiaeth o grwpiau cyfeillgar yn ein hosbis a lleoliadau cymunedol sy’n helpu rhieni a gofalwyr i rannu eu profiadau a chefnogi ei gilydd.
Grŵp cefnogi mamau
Rhannwch straeon, profiadau a chwerthin yn ein grwpiau ar gyfer mamau sydd wedi’u lleoli ledled Cymru.
Grŵp cefnogi Tadau
Dewch i gwrdd a sgwrsio â thadau eraill yn eich cymuned neu wrth wneud gweithgaredd, fel grwpiau cerdded a sgwrsio neu chwarae pêl-droed.
Grŵp Facebook
Cyfle i rieni a gofalwyr gysylltu ar-lein a chefnogi ei gilydd.
Gall gofalu am blentyn sydd â salwch sy’n byrhau bywyd gael effaith enfawr ar les ac iechyd meddwl teulu. Rydym ni yma i wneud yn siŵr bod teuluoedd yn cael yr holl gefnogaeth emosiynol sydd ei hangen arnyn nhw er mwyn iddyn nhw gael ansawdd bywyd da.
Gall ein tîm ymroddedig weithio gyda’ch teulu i’ch helpu i gael y cymorth sydd ei angen arnoch chi fel uned gyfan ac yn unigol.
Rydym ni’n trefnu amrywiaeth o ddigwyddiadau a gweithgareddau drwy gydol y flwyddyn i helpu teuluoedd Tŷ Hafan i gwrdd a chefnogi ei gilydd ac i deimlo’n llai unig.
Rydym ni’n gwybod y gallai brodyr a chwiorydd plentyn sydd â chyflwr sy’n byrhau bywyd golli cyfleoedd, bod â chyfrifoldebau ychwanegol, a theimlo’n unig. Rydym ni’n darparu cefnogaeth arbenigol i frodyr a chwiorydd i’w helpu nhw i deimlo’n well yn emosiynol, a chael hwyl.
Tîm cefnogi teuluoedd
Gallwn ni gynnig sesiynau cyfrinachol, unigol gyda’n gweithiwr cefnogi brodyr a chwiorydd neu, petai eu hangen, therapydd chwarae. Mae hyn yn rhoi cyfle i frawd neu chwaer sgwrsio am deimladau y gallan nhw fod yn eu hwynebu ac ymdrin â nhw.
Amser gyda rhieni
Rydym ni’n helpu brodyr a chwiorydd i dreulio amser o ansawdd gyda’u mam a’u tad, a all fod o fudd mawr i’w hiechyd meddwl a’u lles.
Grwpiau cefnogi
Rydym ni’n trefnu amrywiaeth o grwpiau cefnogi sy’n addas i oedran ar gyfer brodyr a chwiorydd i’w helpu nhw i gwrdd â ffrindiau newydd, magu hyder a gwella eu lles emosiynol.
Diwrnodau profedigaeth
Rydym ni’n cynnal diwrnodau profedigaeth i frodyr a chwiorydd yn unig i’w helpu nhw i siarad am farwolaeth brawd neu chwaer ac ymdopi â hyn.
Mae’n cŵl sgwrsio â rhywun sy’n gwybod beth rydych chi’n mynd trwyddo. Rydw i wir yn hoffi treulio amser gyda fy ffrind ac mae’r ddau ohonom ni’n dwlu ar y Den!
- Rhys, sy’n byw gyda nychdod cyhyrol Duchenne
Mae Iwan yn cael mynd i sesiynau chwarae a chwrdd â brodyr a chwiorydd eraill. Mae Tŷ Hafan yn trefnu mynd ag ef i nofio, ac maen nhw weithiau’n mynd i’r sinema, rhywbeth na allwn ni ei wneud. Mae e’n mwynhau’r cyfan ac mae ef wedi gwneud ffrindiau da iawn yno.
- Julie
Rydw i wedi bod yn rhan o grŵp y tadau ers haf diwethaf ac rydym ni wedi dod yn grŵp clos ond eto’n agored iawn. Dydyn ni ddim yn eistedd mewn cylch yn siarad am ein teimladau. Does dim rhaid. Mae bob un ohonom ni yn rhannu dealltwriaeth ac yn cael cysur yn y grŵp.
- Brad
Rydym ni’n cael y cyfle i fanteisio ar gefnogaeth deuluol, ac mae fy ngŵr a fi yn cael cwnsela nawr, drwy’r hosbis. Mae fy ngŵr fel petai’n mynd i’w gragen llawer o’r amser, ond mae ganddyn nhw’r ffordd arbennig yma. Maen nhw jyst yn deall. Maen nhw’n deall popeth.
Mae cwrdd â theuluoedd eraill o fudd. Mae’n rhoi cyfleoedd i chi rannu a pheidio teimlo mor unig
Mae’r gefnogaeth deuluol a’r gefnogaeth i frodyr a chwiorydd yn help mawr. Mae’n rhoi amser teuluol ac amser fel cwpl i ni. Cyfle i siarad â rhywun sy’n deall, sy’n gallu esbonio pethau ac sy’n deall yr ofn.
Felly, mae hi mor bwysig i nid yn unig ein plant ond i ni fel rhieni, ein priodas, ac i frodyr a chwiorydd hefyd.
O gael gafael ar offer, i ddod o hyd i ysgol, i hawlio cymorth ariannol, gallwn roi cefnogaeth ymarferol arbenigol i chi sy’n gwneud pethau’n symlach ac sy’n gwella ansawdd bywyd eich teulu.
We understand that grief is different for everyone. That’s why we offer tailored bereavement support to individuals and whole families for however long it’s needed.